خطيبى والفستان شيمو 1

» بعد ما قفلت المكالمة، فضلت قاعدة مكاني مش قادرة أستوعب اللي سمعته. بصيت لأمي وقلت لها: ـ ماما، دي أم خطيبي، بتقول عايزة تقابلني من غير ما ابنها يعرف، وإن فيه حاجة لازم أعرفها قبل ما أخد قراري في الخطوبة!

أمي اتخضت وقالتلي: ـ يا بنتي، إنتِ لسه خارجة من اللي حصل، ومش ناقصة وجع قلب تاني. بس أنا كمان نفسي أعرف إيه اللي يخلي أم تكلم خطيبة ابنها في السر بالشكل ده! قولتلها: ـ أنا خايفة يا ماما، مش عارفة أروح أقابلها ولا لأ، وخايفة يكون الموضوع أكبر من اللي إحنا متخيلينه.

أمي مسكت إيدي وقالتلي: ـ اسمعي منها، بس مش هتروحي لوحدك، ومش هتخلي حد يضغط عليكي في أي قرار. كرامتك مش لعبة يا بنتي. تاني يوم الصبح، حماتي اتصلت بيا تاني، واتفقنا نتقابل في مكان عام قريب من بيتنا.

روحت أنا وأمي، ولما شافتني حماتي، كانت عينيها حمرا من العياط، ووشها باين عليه إنها منمتش طول الليل. قعدت قدامي وسكتت شوية، وبعدين قالت: ـ أنا عارفة إنك مش طايقاني دلوقتي، وعندك حق، بس والله العظيم أنا ما كنتش أعرف إنه هيعمل فيكي كده.

بصيت لها وقلت: ـ حضرتك كنتِ عارفة إنه رافض الهدية؟ ولا كنتِ عارفة إنه هيحــ,,ـــــرقها؟ هزت راسها بسرعة وقالت: ـ لا، أنا ما كنتش أعرف أي حاجة عن اللي حصل في بيتكم، ولو كنت عرفت إنه ممكن يعمل كده، كنت منعته بإيدي.

وبعدين مسحت دموعها وقالت: ـ أنا عايزة أحكيلك حاجة عن ابني، ويمكن تكوني سمعتي كلام شبهه قبل كده، بس أنا كنت فاكرة إنه اتغير. سألتها: ـ إيه الحكاية يا طنط؟ قالتلي: ـ من حوالي سنة، ابني كان مرتبط ببنت قبلك، والخطوبة ما كملتش.

وقتها قال لنا إن البنت وأهلها ماديين، وإنهم كانوا عايزين منه حاجات فوق إمكانياته، وإنهم هما اللي فسخوا الخطوبة. أنا بصيت لها باستغراب وقلت: ـ وده له علاقة بيا إزاي؟ ردت عليا: ـ لأن البنت دي جت لي من فترة، وكانت عايزة تتكلم معايا، وقالتلي إن ابني كان بيتعامل معاها بطريقة صعبة، وإنه كان بيقلل منها ومن أهلها، وكل ما تجيب له حاجة أو تعمل له مفاجأة، يفضل يقارنها بغيرها ويقول لها إنها مش كفاية.

حسيت بقلبي بيقبــ,,ـــــض، وافتكرت كل مرة خطيبي كان بيعلق فيها على لبسي، أو يقارنني ببنات قرايبه، أو يقول لي إن مراته المستقبلية لازم تعرف تفرح أمه وتريحها. سألتها: ـ يعني هو كان بيعمل معاها كده برضه؟