خطيبى والفستان 2
خطيبي كان فاكر إن الفلوس والهدايا هتخليني أرجع له بعد ما حــ,,ـــــرق هديتي بإيده، لكن اللي كشفته أمه قدام أبويا خلّى الكل يسكت… وفي اللحظة اللي افتكرت فيها إن الحكاية خلصت، اكتشفت إن فيه بنت تانية كانت هتقع في نفس الفخ!
لما حماتي قالت الجملة دي، خطيبي وشه اتغير، وقام من مكانه وهو بيقول لها بعصبية: ـ إنتِ إزاي تتكلمي مع البنت دي من ورايا يا ماما؟! وإيه اللي إنتِ عايزة توصلي له بالظبط؟! حماتي بصت له والدموع في عينيها وقالت: ـ أنا اللي غلطانة إني فضلت أدافع عنك، وكل مرة كنت بسمع شكوى من واحدة أقول أكيد ابني عنده حق، لحد ما شوفت بعيني اللي عملته في خطيبتك!
أبوه اتدخل وقال له: ـ اقعد يا ابني، وإنت بتتكلم مع أمك بالطريقة دي ليه؟ إحنا جايين نصلح الموضوع، مش نعمل مشكلة أكبر! لكن خطيبي ما سمعش كلامه، وفضل يكرر: ـ محدش فاهم حاجة! دي خطيبتي وأنا حر معاها، وإنتوا مالكوا بيا؟!
بابا قام من مكانه وقال له بهدوء شديد، بس نبرة صوته كانت أقوى من أي زعيق: ـ خطيبتك مش ملكك، ولا من حقك تهينها وتكسر خاطرها وتقول أنا حر. إنت لو مش عارف تحترمها وإنت لسه خاطبها، هتحترمها إزاي لما تبقى مراتك؟
أنا كنت قاعدة ساكتة، وببص له، ولأول مرة ما كنتش خايفة أخسره زي ما كنت متخيلة. كنت بسأل نفسي: هو أنا كنت بحب الشخص ده فعلًا، ولا كنت بحب الصورة اللي رسمتها له في خيالي؟
وفجأة، حماتي فتحت مكبر الصوت في موبايلها، وسمعنا صوت بنت بتقول: ـ يا طنط، أنا آسفة إني بتدخل، بس لما عرفت إنه اتقدم لبنت تانية، حسيت إني لازم أقول الحقيقة. أنا كنت خطيبته قبلها، ولحد النهارده مش قادرة أنسى اللي حصل معايا.
خطيبي صرخ فيها: ـ إنتِ كدابة! وإنتِ عايزة تنتقمي مني عشان أنا سيبتك! البنت ردت عليه بهدوء: ـ أنا مش عايزة منك حاجة، ولا عايزة أرجع لك. أنا اتجوزت وعايشة حياتي، لكن لما عرفت إنك بتعامل خطيبتك الجديدة بنفس الطريقة اللي كنت بتعاملني بيها، خفت عليها من اللي شوفته.
وبعدين قالت جملة خلتني أبص لأمي وأنا مش مصدقة: ـ أنا كمان في يوم جبت لأمه هدية من مرتبي، ولما ما عجبتوش، رماها قدامي وقال لي إن البنت اللي مش قادرة تفرح أمه زي ما هو عايز، ما تستاهلش تدخل بيته!
أبوه حط إيده على راسه، وبص لابنه وقال: ـ الكلام ده حصل فعلًا؟ خطيبي سكت، وبعد شوية قال: ـ أيوه حصل، بس أنا كنت متعصب، وهي كمان كانت بتستفزني! ساعتها حماتي عيطت وقالت: ـ يعني بدل ما تعترف بغلطك، كل مرة تلوم البنت اللي قدامك؟
