متجوزة اتنين

🟥قمة الفجر شوفتها لسيده متجوزة اتنين رجاله فى نفس الوقت
فوجئت امبارح فالمكتب باتنين رجالة  جاينلى الاتنين متزوجين من نفس السيدة
🟥واحد منهم متزوجها بشكل عرفى والتانى بشكل رسمى
والحكايه وما فيها ان الست دى متزوجه فى الاساس من زوجها الاصلى  بشكل رسمى
🟥وزوجها ده شخص محترم جدا وبيشتغل خارج المحافظة بيقعد 25 يوم شغل وبينزل لزوجته واولاده خمس ايام فالشهر.
والراجل طفحان الكوته عشان يكفى طلباتها اللى مبتنتهيش
🟥الزوجه دى بقي نفسها بتشتغل وبدون ذكر هى بتشتغل فين هى اتعرفت على عميل عندها ميسور الحال جدا وفضلت تتقرب منه وكانت مفهماه انها مطلقه
🟥وخاصة انها بالفعل اتطلقت من حوالى سنه من زوجها الاساسى
اللى كانت متزوجاه رسمى ولكن رجعوا لبعض تانى
🟥الشخص التانى ده بقى اللى هى اتعرفت عليه ارمل ولم يتزوج بعد وفاة زوجته وكمان هى مفهماه انها بتشتغل  بالاضافه لشغلها الاساسى بتشتغل جليسة لسيدة مسنه بتروحلها اسبوع واحد فى الشهر خارج المحافظة ومش هينفع تسيب الشغل ده خالص
🟥طبعا دخلت مع الشخص ده فى قصة حب وكانت مستقطعاه وبيصرف عليها ببزخ شديد وعرض عليها الزواج قالتله انا موافقه ولكن هنتزوج عرفى عشان انا اكبر اولادى عنده سنتين ولو اتجوزت رسمى ممكن طليقى يسقط عنى الحضانه وياخد الاولاد منى
🟥هو وافق على كلامها وبالفعل اتجوزها بعقد زواج عرفى بعد ما اكدت كلامها انها مطلقة بانها اظهرت قسيمة الطلاق من زوجها وطبعا لم تظهر قسيمة الزواج اللى رجعت بيها لزوجها مرة تانيه وكمان اخدت من زوجها التانى العرفى مهر 150 الف جنيه وجابلها ذهب ب 70 الف جنيه
🟥وكانت تروح باولادها تقضى معاه تلات اسابيع وفى الاسبوع اللى جاى فيه زوجها تمشى وتروح لزوجها الاول بحجة انها رايحه شغلها اللى فى محافظة تانية واللى هو جليسة لاحدى السيدات المسنات
وفضل الحال ده مستمر لمده اربع شهور بتستغل الاتنين وعيشتها فالحرام وهى عادى جدا ولا كانها رايحه دريم بارك تركب الديسكفرى
🟥لحد ما زوجها التانى العرفى طلب منها انها تسيب شغلها عند الست المسنه وخاصة انه ميسور الحال وانها مش محتاجه اى حاجه وانه مش متجوزها عشان تسيبه اسبوع كل شهر
رفضت بحجه انها مش باصة للفلوس وان ده ثواب وحتى لو ببلاش هتكمل فشغلها برضه 😂
🟥بس لما صمم على طلبه رفضت بشكل جنونى وهستيرى فساعتها الراجل حس ان فيه حاجه غلط وان اسلوبها فالرفض ده مش طبيعى.
فقرر فاليوم اللى هى بتمشى فيه بحجه انها رايحه شغلها انه يتابعها وبتتبعها فؤجى انها داخله عمارة فنفس المحافظة مراحتش محافظة تانى ولا حاجه
🟥طبعا كانت صدمه بالنسباله ولما سال عليها حارس العمارة ورضاه قاله دى زوجه استاذ فلان وجوزها دايما مسافر ومبيجوش غير اسبوع فالشهر وطول الوقت هما الاتنين مش هنا
🟥وطبعا الكلام ده كان الصدمه الكبرى وفهم اللعبة اللى اتلعبت عليه
بس الراجل كان عنده من الشجاعه والجراءة انه اخد رقم زوجها من حارس العقار وطلب من الحارس انه ميجيبش سيرته للست مطلقا
وتواصل مع زوجها وطلب مقابلته وحكاله كل حاجه حصلت واداله كمان صورة من عقد الزواج وطبعا الراجل كان هيحصله حاجه من اللى سمعه
🟥بس الحمد لله ان الاتنين حكموا عقلهم واتصرفوا صح وجولى المكتب
🟥اخدت الاتنين على قسم الشرطة وخليت كل واحد فيهم يعمل ضدها محضر لوحده ويرفق العقود ويتهمها بالز.نا وتع.دد الازواج
واتقيد ضدها قضيتين كل قضية فيها تهمتين الزن.ا وتعدد الازواج
وجارى المتابعه الان فى النيابة وحبسك على ايدى باذن الله 🤌
🟥القضية دى لو اتعملت فى فيلم هيبقي فيلم يصنف انه خيال علمى ولولا انى كنت ماسك العقدين فايدى العرفى والرسمى مكنتش صدقت
🟥ايه العبقرية فالشر دى انا مش عاوز اقول شيطانها وسوسلها لان ابليس تلميذ فمدرستها ابليس كان واقف يتعلم الشيطنه
🟥نصب وز.نا وتع.دد ازواج وكذب وكل حاجه عاوزين تقولوها قولها
حسبى الله ونعم الوكيل بس وعد منى اوديكى فستين داهيه ومش شطارة منى لا بس هو الموضوع سهل اوى على اى محامي فالقصة مش شطارة ولمن رصيد الستر انتهى